已經宣布咗參選高教界選委會選舉嘅公民黨新界西支部主席陳家洛，早排有樣頭痕嘢，搞到佢坐立不安。佢話早前曾經接受港台節目《議事論事》訪問，評論陳馮富珍選世衞總幹事問題，但最後得悉港台可能怕佢係選委會候選人，有任何瓜田李下嘅選舉利益問題就唔好，所以臨時抽起個訪問。
呢樣嘢梗係令陳家洛好煩惱，事關佢都唔清楚，如果喺傳媒發表評論，係咪會跌入啲選舉陷阱，例如將評論當咗做佢嘅宣傳活動，咁咪弊傢伙，最終破產都似？好彩佢最近求證過選舉事務處，發現只要唔用選舉人資格發表相關選舉事宜，一切評論可以正常進行。呢幾日係陳馮選舉衝刺期，睇怕陳家洛都好忙咯。