炫富拳王美韋達最近又嚟料，拆禮物日喺ig連放兩段片晒命，一段係影住佢喺自己住所內金碧輝煌嘅泳池附近徘徊踱步，另一段就係影住佢自己珍藏嘅名貴房車同跑車，全部清一色係黑色，包括4架勞斯萊斯、1架平治同1架法拉利。

美韋達一向鍾意炫富，今次晒屋又晒車，又掀起網上討論，而且佢喺晒車段片個post，下面條caption都頗刺激網民嘅神經，話自己「想出去兜一轉，到底今次揀邊架車好呢？」，有啲似古代啲皇帝點燈選妃咁。

據聞已經同美韋達反目成仇嘅美國元祖Rapper 50 Cent，雖然封鎖咗對方嘅ig，但後尾知道咗美韋達網上晒車，就故意出片同佢打對台，同樣晒自己個車庫入面乜都有，而且勝在多姿多彩，勞斯萊斯佢有黑色，林寶堅尼就黃色，仲有好多紅色法拉利；仲喺caption度鬧爆對方，之前見佢有白色車就買白色，家陣轉晒黑色，都係抄佢，但佢其實五顏六色乜車都有，就寸唔知美韋達下次諗住點抄佢。

周圍結怨嘅美韋達，會喺除夕夜同日本拳手那須川天心打場表演賽，而佢晒完車之後，都有上載一段宣傳片煲熱呢場拳賽，睇嚟已經年幾冇打拳嘅佢，都好期待呢場拳賽。

-------------------
BFB CHAMPIONS 2.0 陪你過聖誕！登入即送應節聖誕鹿球員！累積連續登入可得 ★7保底球探券同免費10抽機會！ http://bit.ly/2xrTKGM
--------------------
《體蘋果》陪你睇波講波
https://www.fb.com/appledailysports