【新增內容】

香港電影導演會今晚舉行周年晚宴暨頒獎典禮，最佳女主角鬧雙胞，分別由《黃金花》嘅毛舜筠，及《空手道》嘅鄧麗欣（Stephy）奪得，毛姐話：「攞咗投票表格之後，冇理由投番俾自己㗎，跟住我掉咗張票，有人同我講『黐線㗎咩？一票就係一票。』」然後毛姐望住Stephy問：「你明唔明？」即暗示如果當日佢有份投票俾自己的話，個影后獎座就由佢獨得。但毛姐就話可以雙喜臨門，都好開心。

跟住到Stephy就話：「多謝你，多謝你掉咗嗰張票，我都唔知講咩，我只係覺得好好彩，我自己都有睇《黃金花》，你嘅演出真係好好，好多謝有投票嘅導演同朋友，每一個獎都係幸運同祝福，我會繼續努力。」

毛舜筠問到有冇後悔冇投嗰一票，毛姐就話：「好神奇，我都冇諗過贏輸係靠嗰一票，因為嗰票係我老公嘅，但係佢唔喺香港，我諗佢都係投我嘅，不過都冇投，點會諗到係嗰一票，好彩因為嗰一票，先會出現呢個結果，感覺都好開心。」

問到今次嘅結果，會唔會對攞金像獎更有信心，毛姐就話：「金像獎呢啲冇得講，一早問咗我老公，佢就話快啲投晒自己。」毛姐喺金像獎連埋最佳女配角已經提名咗七次，毛姐話：「乜攞一次真係咁難咩？難在有好嘅劇本同埋角色，有生之年都唔知仲搵唔到一個可以角逐嘅角色同劇本，如果係排隊嘅，都應該排到我啦好無？」

問到Stephy係咪覺得好好彩？因為毛姐掉咗張票，佢話：「真係好好彩，今次一定要多謝毛姐，首先冇諗過自己會上台，更加冇諗過會兩個一齊上台，攞獎係好開心嘅，好開心嘅係大家對我嘅恭賀同鼓勵，覺得好warm，俾我好大動力。」呢排攞咗咁多獎，會否多咗啲片約？Stephy話：「都有啲傾緊嘅，不過攞咗獎反而係一個責任，要揀好嘅劇本同角色。」

問到Stephy會否對金像獎更有信心？佢話：「我唔想影響自己嘅心情，希望用最平淡嘅心情去迎接呢個盛會，不過我知道自己一定會緊張，總之最緊要靚啦！」

再問到Stephy有冇拉票，佢笑言：「等我飲多兩杯先，不過要投嘅應該都投晒㗎喇，總之鍾意呢部戲就自己會投我囉。」

精選娛聞，喺晒《娛果》
http://fb.com/appledailyent