今晚世盃外歐洲區分組賽，葡萄牙將會作客出戰匈牙利，贏唔贏到對葡萄牙爭取小組首名直接出線非常關鍵。領軍人物基斯坦奴朗拿度（C朗）喺大戰前夕，仍然不忘抽時間做下好事，為一位殘疾小球迷達成心願。

日前已經身在匈牙利布達佩斯嘅C朗，備戰世盃外之餘，特別抽空去見一位小球迷。呢位患上肌肉疾病嘅小球迷要坐輪椅代步，身穿皇家馬德里球衣，見到C朗自然非常開心。C朗亦有將佢哋合照放上社交網：「這名小朋友希望見到自己的偶像，足球世界往往能夠發揮超越在球場以外的魔力。」