才學和英俊一向不掛鈎，要麼才情橫溢，但長相平平無奇，要不然擁有潘安樣貌，但內涵捧蛋。不過，近日樂壇出現了一名相貌和才華兼備的「靚仔大文豪」─周柏豪。一張玻璃杯破碎的相片，一段抒發感受的文字，風花說月卻遭網民無情打擊，陶傑指題材無聊，宜家傢俬、無綫新聞、亞視賽馬節目輪流抽水。19歲那年已經歷人生地獄期的大文豪看淡世事，只淡淡道：「是但啦！只要大家開心就得，我喺呢行係娛樂大家。」　撰文：駱華齡

現年27歲的周柏豪很有原則，大專畢業、主修文商科，數喜歡的文學作品則欠奉，但敏感和細膩的性格令他喜歡以創作來抒發感受，不只在音樂上，也有透過文字和相片將內心所思所想表達出來。單從外表難以相信柏豪是愛閱讀的人，說他愛玩愛籃球，可信度高十倍，但英俊外表下的柏豪有一顆纖細的心。

絕不介意被嘲笑

近日柏豪在facebook上載了一張玻璃杯打爛到支離破碎的照片，配合200字的短文，柏豪一夜間成為網上熱爆人物，數以萬計網民紛紛轉載爛玻璃相片及文字，柏豪從欣賞角度去表達對玻璃杯的珍惜之情，卻遭到網民無情取笑，甚至在其facebook內留言攻擊，甚麼無病呻吟、狗屁不通……要多難聽有多難聽，連才子陶傑也插一刀指題材無聊，宜家傢俬抽水拿此事賣廣告，但又無分版權費給當事人；無綫新聞和亞視賽馬節目也輪流抽水，才情橫溢的柏豪即被冠以「靚仔大文豪」之名，是褒是貶，說真的柏豪絕不介意。

滿面暗瘡跌谷底

《紅樓夢》中曹雪芹寫道：「滿紙荒唐言，一把辛酸淚！都云作者癡，誰解其中味。」每個作品其實只有創作者才了解當中最實在的意思，旁人能領悟的又有多少？《玻璃杯》引發的事端，柏豪一笑置之說：「我寫嘅嘢唔係文學，係表達內心嘅嘢，可能大家唔知我寫乜，但其實我唔需要寫到人明，唔使所有人認同，嗰刻我唔開心，又打爛隻杯，見到燈光折射落玻璃碎度，我覺得好靚，於是拎部相機出嚟影，短短30分鐘吸塵、影相，我將唔開心嘅嘢忘記咗，喺嗰一刻打爛個杯反而係當日開心嘅事。」
食得鹹魚抵得渴，出道四年的柏豪比起很多人已看得很化，被嘲笑被奚落他覺得無所謂，反而慶幸終於不靠緋聞上頭版，最開心竟然是《蘋果》動新聞送給他3D動畫公仔，他從另一角度去看待今次事件，因為他曾經歷過一段人生煉獄期。19歲那年，柏豪因為生到滿臉暗瘡而患上情緒病，他說：「嗰時我成日匿埋屋企，覺得自己會死，所有人都害緊我，冇嘢令我出到屋企，我喺屋企睇書、學結他、練琴，基本上我乜書都睇，愛情小說、致富書、哲學書等，嗰段時間令我對身邊好多事都好敏感。」
柏豪形容那時用了兩年時間不斷攻擊自己，認為自己是世上最沒用的人，看不起自己，因為有那兩年的衝擊，所以他覺得塵世間已沒有任何事及人可以攻擊到他。對於別人的嘲笑打擊批評，他淡淡說：「是但啦！我冇所謂，只要大家開心就得，我喺呢行係娛樂大家。」

「跌爛手提都影」

愛創作寫歌的柏豪將玻璃杯的碎片炮製出如詩如畫的場面，大眾都期待他會推出《玻璃杯》歌曲或小說散文，但他斷然拒絕將玻璃杯放大，又強調不是特別鍾情玻璃杯，他笑說：「唔關玻璃杯事，就算跌爛手提我可能都會影，不過手提未必有玻璃杯嘅折射，創作唔關杯事，只係覺得人俾好多物質麻醉而忽略好多事，人與人之間感情亦好疏離，我有首歌《金》就係講呢樣嘢，其實好多嘢都值得欣賞，我覺得世界唔係咁，我睇嘅世界同家價值觀好唔同，我係好享受睇到嘅嘢，亦都好珍惜，因為我隻眼本身好弱，自己慶幸仲影到相睇到嘢，成日覺得自己隨時會盲，所以我識享受欣賞身邊事。」

慈善大文豪

周柏豪除了被封做「靚仔大文豪」外，其實也可以封他做「靚仔大慈善家」和「靚仔環保先鋒」，說到慈善、環保，柏豪有他的一套理論。眾所周知，柏豪熱愛影相，但他抗拒拍食物，特別是肉類。

宣揚關注世界

柏豪說：「家嘅人食飯影相之後上載，我唔會咁，因為我覺得肉類係動物嘅死屍，影相就好似獵人拎住個獅子頭嚟影，自己都因為咁少咗食好多肉，啲人影相唔會去想碟餸好唔好食，肉質靚唔靚，但我自己就會想認識個廚師，問佢點解會有咁嘅構思，因為我睇事係比較敏感同細微。」
柏豪直言入行不是為賺錢，他希望透過自己些微影響力去推動其他人去做有意義的事情，所以《玻璃杯》令他網頁粉絲人數激增，他覺得是事件的最大得着，因為他希望當中的人能將他上載的連結轉發到全世界，當中包括關注流浪貓狗問題、宣揚戒食狗肉和魚翅等，他強調不是偉大到想改變世界，只是多了一個渠道去宣揚這些，幫到人又幫到自己，他認為最大得着最終是他周柏豪，他說：「我平時會同家人去探訪老人家，會攞住結他唱歌畀老人家聽，亦都有同其他慈善機構合作，生命係需要做呢啲嘢。」