【韓流】秋瓷炫今出院 事務所認一度留醫ICU
秋瓷炫于曉光同床異夢2
韓劇《OH!必勝奉順英》39歲女星秋瓷炫本月1日為大陸演員老公于曉光誕下囝囝,不過產後當晚佢出現癲癇症狀,被送到急症室救治,早前更有報道指秋瓷炫昏迷近10日,令粉絲非常擔心。
事後秋瓷炫所屬事務所澄清秋瓷炫情況有好轉,目前喺普通房病休養緊,短期內仍會留院調理身體及休養。
秋瓷炫及于曉光曾以夫妻檔演出節目《同床異夢2-你是我的命運》,節目噚日播出新一集,節目組以字幕形式透露秋瓷炫近況,表示:「唔需要擔心,冇任何問題,正在康復中。」向觀眾報平安。
喺今日傍晚時份,秋瓷炫嘅所屬事務所發聲明表示:「秋瓷炫於韓國時間今日下午1點左右,以健康嘅樣子出院。秋瓷炫本月1號誕B後因癲癇症狀,被送到急症室。因痙攣時致分泌物流入肺部,造成吸入性肺炎,秋瓷炫一度留醫ICU並要靠氧氣罩呼吸。喺醫生嘅照料及粉絲嘅應援下,秋瓷炫已康復並於今日出院,返到坐月中心照顧BB及休養,但秋瓷炫仍需復診。」
更多韓流,喺晒《娛果》
http://fb.com/appledailyent