(新增回應)

全港唯一提供2018 FIFA世盃直播嘅OTT平台Now E，噚晚法國對秘魯嘅C組賽事突然死機，上半場播咗約10分鐘就睇唔到，到下半場最後十分鐘先逐漸恢復。

唔少球迷都喺Now E同ViuTV嘅facebook專頁留言投訴，為彌補過失，有關方面隨後宣佈喺ViuTV免費播阿根廷對克羅地亞賽事補數，以平息眾怒。唔少球迷都讚NowTV同ViuTV今次應對得好快，有網民講笑話﹕「可唔可以一直壞落去啊！」、「ViuTV好波！多謝你給我們這些升斗小市民一個小確幸！」

不過，畀咗錢買Now E盒子嘅市民就嗌回水﹕「我哋畀咗過千蚊，然後你個盒子壞咗，睇唔到法國。依家就突發畀全香港人都有得睇...Now E真係好...lor，回水啊！」

而ViuTV就強調是個別事件，回覆《蘋果》謂﹕「播放法國對秘魯及阿根廷對克羅地亞賽事為個別事件。ViuTV將直播餘下精選10場賽事包括決賽及準決賽。」

而Now E今日凌晨亦有在fb解釋事件﹕「我們深感抱歉，部分Now E用戶在觀賞法國對秘魯賽事期間受到影響。雖然大部分Now E用戶的服務已恢復正常，我們亦同時安排Now隨身睇app(Now Player) 免費頻道630直播凌晨兩點開賽的阿根廷對克羅地亞賽事。ViuTV 99台及ViuTV app亦會同步直播。今次事故相信與第三方服務供應商有關。我們正進行全面的調查，以確保服務能暢順運作。」］

網民回應怒火衝天，有人謂：「煩請進行全面的調查後，清晰及不隱瞞地公開一切資料，不要如港鐵馬時亨或現任運輸及房屋局局長，前機電工程署署長陳帆一樣，否則作為忠實 貴公司客戶的我，已付了千二購買了NOW E電視盒！或考慮向消委會及海關寄投訴信。」係囉，Now E所謂嘅「第三方服務供應商」，又同電盈有冇關呢？

Now E公關今日再回覆《蘋果》﹕「對於Now E昨晚服務一度受到影響，我們深感抱歉。今次是個別事件。我們昨晚已立即調查系統事故原因，並已找出事故原因及已解決。我們重視客戶意見及體驗，會繼續提升系統監控，並繼續會為廣大球迷帶來精彩的世界杯。」

一網睇盡
足動世盃 直擊俄國最前線
https://hk.feature.appledaily.com/worldcup2018/