日本尊尼組合KinKi Kids成員堂本剛上月底因突發性失聰入院，停工留院一星期後，於本月4日已出院，但佢現時仍未完全康復，未能出席剛於周六及日嘅兩場KinKi Kids出道20周年紀念騷。

堂本剛未能演出，令到個騷嘅內容都作改動，除咗隊友堂本光一落力表演，同門嘅長瀨智也同生田斗真亦有現身任嘉賓。堂本剛就以直播形式同粉絲見面，佢同堂本光一互相着住印有對方肖像嘅T恤現身，仲亦唱咗幾句《to Heart》，尾聲時，堂本光一就同全場三萬歌迷唱《Anniversary》。

前日，堂本剛接受電台訪問開腔談到自己病情，佢話現時仍有耳嗚情況，而退院一個月內佢唔可以接受好大嘅聲音，所以唱歌工作絕對唔可以做，佢現時就有接受針灸治療，堂本剛話雖然好痛，但都冇辦法。