黃耀明同蔡德才今日到商台接受訪問，宣傳下月中假賽馬會綜藝館舉行嘅「黃耀明明曲晚唱」音樂會，4場門票火速售罄，並即時宣佈加開最後4月10同11日兩場。

明哥指騷名係用佢86年喺商台主持節目名，佢構思今次個騷會似電台節目咁，佢唱自己嘅歌之餘，又會翻唱佢鍾意嘅歌，更準備好走落台同觀眾互動，佢話：「今次想做啲新嘢，唔想次次都好大龍鳳，或者係要紅館，今次會係好親密近距離。」

音樂會只得明哥同蔡德才，冇其他樂手，蔡德才又唔想只係得一個琴，加上騷上音樂會有大量電子元素，所以事前有大量準備功夫。

明哥透露農曆年之前已經綵排，加上今次主張所有事都隨心所欲去做，所以原先影咗幾款海報造型，不過都被明哥日前喺三藩市一張手機自拍相取代咗，佢話：「嗰日見到個天好藍咪用電話自拍，點知用埋做海報。」明哥笑指首次冇化妝同造型設計嘅海報相。

精選娛聞，喺晒《娛果》
http://fb.com/appledailyent