【北韓犯禁唔怕累死領隊?】東方昇為出書:拍片之嘛!佢stop我咪停止囉!
北韓領隊東方昇北韓包膠羊角酒店
東方昇今次入北韓,當然係跟團,他在《北韓包膠》一書中開埋旅行社個名。導遊一早講明,
1.唔准離團。如果擅自離隊,導遊後果嚴重。
2.唔好叫「北韓」,要稱朝鮮。
3.唔好亂影相,包括軍人不能影。
但東方昇係典型香港人,鍾意走下「灰色地帶」,入北韓玩fb live就辯稱「佢冇講過唔准玩嘛,佢哋可能唔知道有fb呢樣嘢」;影軍人,佢就話:「大家係唔可以影佢哋。不過,冇人叫你兜口兜面微距影佢面上嗰粒千年黑頭0架嘛,所以其實你只要偷偷咁影,佢根本都吹你唔脹。」
【半夜溜出羊角酒店
東方昇兩度圖潛入神秘五樓】
入住神秘的羊角酒店,旅客晚間不能外出亂走,東方昇當然無視,但出到去方圓十里都黑麻麻,其實冇嘢睇。之後東方昇意圖闖入更加神秘的五樓,都市傳說這裡是「監視中心」,監視羊角酒店所有樓層房間。電梯不能到,只可以上到八樓,一出電梯就是一片黑,東方昇竟然大膽到開著手機燈摸著牆而行,只聽到自己呼吸聲——幸好最後他都知驚,回頭是岸返房瞓。
翌日,從導遊口中得知地下有道門,門後有隱蔽樓梯直上五樓,東方昇又去,一扭,度門鎖咗。
【唔怕連累團友領隊
「我喺任何地方都可以拍片」】
始終跟團去北韓,有冇諗過咁做可能連累團友或領隊?東方昇接受《蘋果》訪問時稱:「拍片之嘛,我喺任何地方都可以拍片,完全覺得冇呢個問題,如果佢stop我咪停止囉,我唔會反抗。甚至我喺三八線問軍人,有冇信心打敗美國?大家覺得我挑戰底線,其實有乜挑戰底線呢?佢作為捍衛國家非常合理,我幾佩服佢,真係對國家嘅歸屬感,起碼相對香港一啲人,因為利益而話熱愛祖國,我覺得佢比較真誠。」
22歲美國大學生瓦姆比爾(Otto Warmbier)赴北韓送命,東方昇說:「我覺得美國學生有唔啱,因為聲稱佢偷咗幅畫,但佢冇公平審判,同埋刑罰非常之重。不過又要講番,劉曉波冇偷嘢,佢講咗啲說話啫,都要坐11年,其實可能內地仲嚴過北韓。」
北韓無疑是極權國家,聲稱自己「冇做過乜嘢踩界行為」嘅東方昇不斷挑戰底線,可是輕視禁令?他稱:「裡面可以用電話,可以視像通訊,有好多外國人去旅遊,唔覺得好極權,甚至乎你問我,就算獨裁極權都係政府,人民比內地人仲純,最難忘係勞動節喺平壤嘅公園見到啲人飲醉酒、唱歌、洗腳,佢哋會揮手會笑,同我跳舞。」
攝影、拍片:沈健程
場地:Big Echo ibox