九龍倉（004）主席吳光正將於下月中卸任主席與董事職位，臨別贈言，佢喺「年報特別版」中爆料，指九倉旗下重要物業──銅鑼灣時代廣場，現址原本計劃跟一間本地發展商合作興建住宅物業發售，後來因市道不景而擱置，再喺佢堅持下建成時代廣場。
68歲嘅吳光正喺財經界向來低調，每年只係喺股東會後有機會接受傳媒提問，興之所致，佢就會滔滔不絕，好似舊年股東會後，佢就花逾一小時大談佢對政改嘅睇法。要佢話當年或者有感性言論，可謂少之又少。

呢次佢計劃逐步交棒畀阿仔吳宗權，決定喺下月中股東會舉行之後卸任主席與董事職務，只擔任首席顧問，佢喺最新一份年報中，有一篇話當年嘅主席報告，唔知係咪想更多人分享，佢將呢篇主席報告抽出嚟，印製一份「年報特別版（Special Edition）」，據講，九倉都真係首次咁做，大概上市公司當中，暫時亦只得佢印製年報特別版咁特別！
吳光正主要講番佢喺九倉37年做過乜東東，九倉最重要資產當然係尖沙嘴海港城與銅鑼灣時代廣場，時代廣場原身係電車廠與街市。吳光正爆料，指原先可能與一間本地發展商合作發展住宅項目，由於市道不景，雙方同意擱置，後來九倉決心永久終止住宅計劃。
佢提到，時代廣場嘅重建計劃喺1989年展開，當年香港出現嚴重信心危機（六四事件），好多人認為佢咁做不切實際。相信佢好慶幸自己當年堅持，令到香港有此地標。


李華華
mailto:[email protected]