當年今日

星級教室:按摩肩膊增進男女感情

蘋果日報 2002/08/07 00:00


我苑仔噚日教過大家按摩頭部嘅穴位,試咗係咪舒服啲呢?今日我將會教大家按摩膊頭。
都巿人長時間工作,經常坐喺寫字枱操作電腦,久而久之條頸會痛,肌肉因疲倦而勞損,好多人會患上肩周炎,其實可以按摩吓肩膊嘅斜方肌(頸尾對下嘅位置)紓緩下痛楚。

減壓紓緩痛楚
被按者只要好似平時一樣坐喺櫈度,放鬆肌肉,然後搵人用拇指配合其餘四隻手指嘅動作,按摩下肩膊嘅斜方肌,以被按者可以承受嘅力度,一下一下咁按,咁肩部嘅疲累就得以紓緩,重複咁按幾十下。
重有呀!不妨同大家講,學識同男朋友或女朋友按摩肩膊,除咗可以幫對方減壓,紓緩肩膊痛楚外,其實咁樣按摩係可以增進彼此感情。當年我都係靠呢一招,搵到藉口同心儀嘅男士有肌膚之親。 (五之二)
口述:苑瓊丹 筆錄:比華利
攝影:陳偉權 示範:岑寶兒
場地提供:扶元堂穴位治療按摩中心