周秀娜晏晝現身鑽石山，出席下個月舉行嘅「高跟鞋競跑大賽」記者會，娜姐仲即場同兩名男Model示範點樣著住高踭鞋跑步。講到高踭鞋，娜姐話自己屋企大大話話都有過百對:「自己一個住，成屋都係鞋同衫，成日都同自己講唔好買咁多，但每次都總會搵到理由去買。」

雖然有咁多鞋，但娜姐話有一對鞋自己特別有意義:「果對係第一次出糧買，好貴，花咗我半份糧，曾經著住佢做過好多工作，仲試過追巴士，依家即使爛晒都唔捨得扔。」

談到佢嘅內衣生意，娜姐話深圳嘅分店啱啱裝修好晒，佢話:「仲未Opening，遲啲都要上去望吓整成點，希望下半年有機會喺內地唔同地方再開。」娜姐話雖然辛苦，但做自己鍾意嘅嘢係值得，又話有留意外國報道講女星EmmaWatson宣傳息影兩年專心做女權工作，娜姐話見到都好羡慕，問佢會唔會打算息影搞生意？佢講笑話:「唔會啦，除非嫁得出啦。」