黃又南今日到柴灣ViuTV錄影節目《晚吹—有病有真相》，講述因隔代遺傳，小學已經有哮喘，足足纏繞十幾年。佢話細個時仲以為係支氣管炎，每逢轉季都要聞氧氣，細個打完波一飲凍嘢就中招，唞氣hehe聲，返去一定被阿媽鬧，一度要靠藥物控制病情，o依家已經唔需要，雖然冇得斷尾，靠運動游水鍛煉心肺，近幾年哮喘已經冇再復發。

又南話雖然有病，但就因禍得福，接拍過哮喘藥廣告，現時醫生會建議他帶備特效哮喘藥傍身，最嚴重時會唞唔到氣，啲藥足夠保命去醫院。

又南另提到爸爸患上腦退化症，早前走失再尋回，令佢好擔心，又南話：「爹哋狀況好好，令我放心好多，冇惡化，仲比以前醒神咗，但我唔會因此而鬆懈，暫時佢好似知道唔可以自己一個出門口，加上爸爸帶咗行蹤手錶，我可以隨時知道佢去咗邊。」