今年第1個交易日，大市牛皮到極，全日成交僅得27億元，恒指高低波幅127點，悶到瞓着覺。不過，細價股就另一個世界，好多隻都飛沙走石，升幅小過13.5%嘅，無緣打入10大。
科技股炒得最熱，只講大成交嗰批，tom.com（8001）、和記港陸（715）、品質國際（243）、冠軍（092）同e-Kong（524）等，升幅均逾1成。
品質國際有件公司輪609，是日彈升近14%，做咗升輪榜阿2。609係長命輪，重有兩年期，溢價111.2%，槓桿率7倍，玩唔過。
609行使價6.25元，正股做緊3.175元，兩年後能否升倍幾，好難講，不過即使得，𠵱家買隻輪揸到尾，都只係打和，如果短線睇好品質，應該炒正股，何必畀咁高時間值（溢價）炒隻輪？

714數據較實際
升輪榜排頭位嘅，係文化傳信公司輪714，正股（343）升6%，帶動隻輪升兩成。714今年5月到期，溢價6.2%，槓桿率3倍，數據唔算靚，總算較實際，缺點係成交疏，要炒都係炒正股。