葡萄牙國家隊隊長基斯坦奴朗拿度（C朗）禮拜四贏得第五次金球獎之後，勁有霸氣咁表示，毫無疑問自己係有史以嚟最出色嘅足球員！

呢位皇家馬德里前鋒雖然「只係」追平巴塞隆拿前鋒美斯五奪金球獎嘅次數，但C朗強調自己仍然係高一班波：「從來無任何球員贏得比我更多嘅個人獎項，我仲要唔係淨係講緊金球獎喎，咁應該說明咗一啲嘢。好似打拳嘅美韋達同NBA嘅勒邦占士咁，佢哋唔係靠僥倖達到今時今日嘅水平，係有好多原因加埋一齊。要成為最好嘅一個，仲一直停留喺果度，你一定係比其他人更有天份。」

C朗繼續話：「我一個人做唔到嘅嘢，其他足球員都一樣，但我可以做到佢哋做唔到嘅嘢。無人比我更加全面，我兩隻腳都踢得波，我夠快、有力量、頭槌又勁，我入到波，又會助攻。你哋可以繼續撐尼馬或者美斯，但我肯定，無人比我更加全面。你哋或者會話我囂張，但當你企喺高位，自然會俾人批評，無論喺好同壞嘅日子，我都係有史以嚟最好嘅球員。」

--------------------
係你！打造星級球隊，征服各地聯賽！立即加入『BFB CHAMPIONS 2.0』！ http://bit.ly/2xrTKGM