台灣女藝人林依晨、韓劇《巴黎戀人》男星李東健、薛世恆、鄺祖德、林知譽、蔡一鳳、盛品儒、Sunny Wong、馬天佑同林作等，噚晚喺中環出席網上購物平台派對。

林依晨話都有睇李東健嘅韓劇，不過就未見過真人，佢話如果有好劇本嘅話，好樂意同韓星合作，因為韓國有好多好嘅演員同歌手。平安夜係林依晨同老公嘅結婚周年紀念日，佢話會上網買份好禮物，但就唔會點慶祝，因為平時大家好多相處點滴。

儲儲埋埋咁多相處點滴，幾時考慮生個BB加多啲生活情趣？佢話：「09年我做了一次手術之後，一直也有調理身體，不是為生孩子才刻意去做這件事情，現在每星期也保持運動，但農曆新年要拍古裝片，生孩子最快也要到明年的下半年。」

另外，林作舊愛麥明詩性侵事件，麥媽媽同林作媽咪都分別表態，不過事後就有人覺得林媽媽講得太多，林作話：「其實我唔清楚媽咪講乜，我去咗內地工作，後尾至知佢發過言。我唔再評論佢（麥明詩），總之唔會再講，我印象中亦叫媽咪唔好再講，不過我媽咪係一個善忘嘅人。」麥媽媽有冇唔開心？林作話：「我就唔知喇，我媽呢幾日着咗草，我都見唔到佢，最重要係唔關我事。我媽咪點到我管，我哋相處好似朋友，各有各做，做好自己最重要。」

更多娛聞，喺晒《娛果》
http://fb.com/appledailyent