新世界發展（017）旗下尖東旗艦項目——文化購物藝術館K11 MUSEA上月低調開幕，相信去過嘅朋友都會有「wow」嘅感覺。場內設計的確有別於傳統商場，尤其係個巨型「金波」（Gold Ball），閃閃發光成個水晶球咁，個場一定好揼本。但華華聽聞，原來成個場嘅造價同其他同級商場差不多，關鍵在於K11 MUSEA用少咗一樣同業經常會用到、而價錢又幾貴嘅物料。

估唔到呢？開估啦！就係雲石喇。雲石可以話係每一個高級商場必用嘅建築材料，最常用於鋪砌地板。新世界之前公佈過，成個Victoria Dockside綜合項目投資額約200億元，雖然冇個別透露K11 MUSEA投資額，但其樓面面積近120萬呎，地板以木紋磚取代其他同業常用嘅雲石，相信慳返唔少成本。

不過，慳咗嘅錢唔係自己落袋，只係用咗喺其他地方。成個場邀請咗近100個海外及本地設計師參與，而且擺設咗唔少家具藝術品，K11創辦人鄭志剛熱愛藝術，創意有價，一定唔會待薄每位設計師的心血嘅。

李華華