英國有個靚仔廚師叫Jamie Oliver，煮嘢有Gimmick，成日揸住駕綿羊仔去買嘢，好有型。我都係大廚，煮嘢一樣有Gimmick，仲染咗少少金毛，揸部二千cc銀色日產跑車去街市買海鮮，直情威過Jamie仔！

講咁耐，還未自我介紹。我叫黃俊威，英文名Welly，未夠廿四歲就做總廚。唔怕老實講，我份人最鍾意Show off，樣樣都要與人唔同。好像這道白酒忌廉煮青口，一般人會用法國青口，我就專登用新西蘭貨，大大隻才可引人注意嘛！煮時人家用白酒把青口煮到開口便算數，我卻嫌青口海水味太濃，要把第一轉白酒倒掉，重新加酒再煮。姿姿整整，就是要讓人客食到你花過心思，才知道你與別不同。

我由細到大都好鍾意與別不同的感覺，同學着衫求求其其，我着衫就要跟足時裝雜誌去襯，出來一定威過人。公司新春團拜卡拉OK比賽，我會第一時間飛身上台獻唱，最叻唱張國榮同黎明的歌，一開口人人都望住我讚嘆不已，一世仔最enjoy就是這一刻。

我家有六兄弟姊妹，老父驚我們學壞，所以管教十分嚴。我讀到中三，成績欠佳，阿爸驚我誤入歧途，就迫我跟姑姐學做皮草裁縫，怎料我有鼻敏感，一見皮草便由朝打噴嚏打到晚，最後他也拿我沒辦法，准我自己找工作。我睇報紙見做學廚有$5,000一月，比幫姑姐做皮草好得多，就戇居居去見工。

第一日返工，師傅要我切薯條，我連刀都未識揸，就要切幾大籮薯仔，結果連手也切傷。但心想，好歹是第一份自己選擇的工作，只好咬緊牙關捱下去。但做落卻發覺自己有下廚的天分，人家要五分鐘才切好的東西，我三分鐘就搞掂。師傅煮菜，我看一兩次就知道怎樣煮，結果做了四年，就由學師升到助理大廚。在廚房，我找到自己的價值，於是全情投入去學習。中、英、法、意、日……每種菜式的餐廳我都去打工，吸收了竅門就走，幾年間便大大話話轉了二十份工，希望在最短時間內出人頭地。

97年，我加入蘭桂坊集團旗下的Red Rock Bar&Grill做senior cook，那餐廳的廚房只有我和總廚兩個人，我由切菜、校汁、打湯到燒扒都一腳踢，試過同一時間燒三十塊扒，我不單沒有抱怨，反而愈做愈興奮，連發緊燒都返工！地獄式的訓練，把過去所學的技藝都昇華出來，做出的菜式人客都大表讚賞。老闆見我表現超卓，一年間就連升四級，升到做總廚。那年我不過24歲，已住海景樓、養了一部跑車，內心真的飄飄然。之後我輾轉轉了幾間餐廳做總廚，也替人開過餐廳賺過錢，但我卻不滿足，因為無論做得多成功，那都是別人的事業，我要有自己的舞台，我要所有的掌聲都歸我所有。

於是我把樓都賣掉，拿了百多萬，在西貢開了自己的餐廳。我要盡情Show off，所以餐廳專登取名Chef Welly's Kitchen。餐廳掛了部LCD，全天候播放電視台對我的訪問。雖然出牌困難，我都專登在餐廳開一個Open Kitchen，就是要等人客可以一邊食、一邊睇到我在廚房表演。也許你會笑我自大，但等咗咁耐至有這個表演的機會，我才不會放過，有料梗係要盡情Show off啦！

大廚Profile
黃俊威，潮州人。17歲入行做西廚學徒，97年加盟蘭桂坊集團任廚師，只短短年多便升到總廚。其後歷任Issue Cafe及Double Star總廚，06年於西貢開設自家餐廳Chef Welly's Kitchen，圓了做老闆夢。

（原文刊於2006年555期《飲食男女》）

立即免費下載《飲食男女》App： http://onelink.to/etwapp
《飲食男女》網站： http://etw.hk