今屆立法會選舉競爭激烈又充滿戲劇性，告急嘅參選人結果得票最多，勝券在握嘅反而危危乎，甚至落敗，好似「魔童」王維基，佢率先打出ABC呢隻牌，又因港視（1137）不獲發牌而人氣高企，點知都係唔夠票，選民無法送佢入立法會。股民隨即用腳投票，連累佢隻港視噚日逆市跌近一成，收市報1.41元。
唔少股民上星期五買定港視，可能諗住王維基一定入到立法會，到時有一番作為，刺激港視當日收市升8%，點知噚日朝早起身知道佢落敗，惟有即刻沽貨喇。

689長盈爆升43%

王維基近年真係面對幾多挫折，有電台節目主持人噚日早上同佢做電話訪問，其間爆出一句「你諗住港視攞到牌又攞唔到，諗住做到立法會議員又選唔到」，搞到王維基一時間都畀唔到反應。
有趣嘅係，港視股價下跌，王維基最憎嘅689竟然一度爆升43%，世事實在太奇妙了吧。不過呢隻689同梁振英無關，只係股票冧巴689嘅長盈集團。呢間公司上月底易主，由環能國際（1102）主席孫粗洪買入約28%股權，成為主要股東。根據資料，孫粗洪仲持有中策（235）、勇利航業（1145）同伯明翰環球（2309）股權，隨時變成新一代殼王。

李華華
mailto:[email protected]