六四事件31周年將至，面對疫情，數十載無間斷在維園六四集會燃點起的燭光，或不能再集體復見。面對中共這年極權壓港，在香港保護傘下生存的支聯會，被迫地下化的厄運恐要成真，支聯會副主席鄒幸彤坦言這個憂處一直存在，「唔合法咪唔合法囉」，指中共高壓手段離不開兩三道板斧，由中共對《基本法》22條「釋法」撕開遮醜布開始，勢又拉又鎖，以法律手段陸續將異見者「消音」，寄望港人引內地維權人士經歷為鑑，壯大國內外結盟及實力，盼念念不忘，必有迴響。

記者 梁穎妍

中聯辦發聲明自稱不受《基本法》22條規限，有權代表中央政府行使監督權，支聯會副主席鄒幸彤接受《蘋果》訪問時強調，支聯會被監督甚至被冚檔的風險一直存在，「支聯會都好清楚自己搞嘅（嘢），係中國政治法律框架下所謂顛覆國家嘅嘢」，本身是大律師的她斥中聯辦之說如同超然於《基本法》之上，「一國兩制一開始就好依靠中央政府自我約束，香港政府有實際辦法約束佢咩？冇啊！」今次變相釋法形同直接撕開一國兩制遮醜布。

「就算中國法律，中國共產黨又幾時聽過佢自己憲法講先？所以唔完全係法律問題！」鄒認為比起法律條文爭議，更要警惕的是中共在最新國際形勢下要擔當話事人的大策略，「六四後幾年，相對算韜光養晦啲，唔會太高調惹大家圍剿佢或者反對佢，比較會迎合返國際遊戲規則」，近年則要爭奪主導地位，人權、民主及文化價值唯中共獨尊，亦放棄維持一國兩制假象，「要人聽佢說話，唔再配合返國際嗰套說話，香港同樣係大策略下嘅反映，佢唔再係迎合你定畀佢嘅一國兩制框架。」

「唔合法咪唔合法囉，主要係做嘢嘅人係咪存在」

投入支聯會工作10年，見盡中共如何打壓維權人士及組織，鄒幸彤形容中共對香港「玩嘅板斧都係嗰幾套」，不外乎洗腦，「各種思想『我哋（中共）講嗰套先啱』嘅論述，好強咁灌輸去所有人度」，以及立法為各組織設下生存框架，「定啲《國安法》、《NGO法》、《反間諜法》，各種法律條文框框框死你。『你想合法生存咪跟我遊戲規則玩』，跟得遊戲規則玩時，好多嘢係做唔到啦已經！」再來配合拘捕及檢控，「總之令你喺成個社會消失咗啦！」

大抓捕已在香港發生，唯一慶幸的是維權律師王全璋一旦被捕就不見天日或秘密受審的「頂層策略」尚未出現，「佢個策略擺喺香港嘅漏洞，就係拉完鎖完你嗰批（支聯會主席）李卓人，拉完你之後搞場大龍鳳、又係放返出嚟又再講嘢」，鄒自言不是預言家，「覺得佢想達到呢個效果，佢會點做真係唔知。」

但她強調支聯會不會屈服，包括不會為了適應遊戲規則隨便改綱領：「連自己靈魂都冇咗你（仲）保住啲咩？一啲核心訴求，建設民主、結束一黨專政都唔會變。」並指16年內地實施《境外非政府組織境內活動管理法》後，不少組織都地下化，自從特區政府利用《社團條例》對民族黨施第一刀後，支聯會恐亦遭此厄運，但鄒直言「唔合法咪唔合法囉，主要係做嘢嘅人係咪存在。」

面對中共打壓招數會水來土掩

每年在維園點起燭光就是爭取民主自由的心仍然存在的證明，惟今年的六四集會在疫情之下或遭警發反對通知書而無法如常舉行，鄒寄語市民對自身權利及自由保持警覺，「有啲權力收咗返嚟佢唔會再放先係擔心嘅位」。

特區政府以抗疫禁六四集會，誰也說不準還有沒有下次，現時支聯會擬照辦六四晚會，鄒稱最重要信念是讓人「繼續出嚟」。

有關訪問在北京推出「港版國安法」前進行，最終支聯會頭上再多一把被取締的刀，鄒幸彤坦言，《國安法》表明針對顛覆國家政權，對以「結束一黨專政」為主要綱領之一的支聯會恐怕避無可避：「我唔覺得佢係特別針對支聯會，但支聯會好明顯係踩中條紅線」，認為《國安法》更大目的是製造寒蟬效應，「要嚇到你乖乖地」，但鄒以已故諾貝爾和平獎得主劉曉波為例，「國內有咗《國安法》好多年㗎啦，但劉曉波佢哋都一直繼續做，堅持爭取民主、自由。」她堅定說今年六四集會高呼「結束一黨專政」不會成絕唱，「要禁你，佢（北京）有百萬個方法」，指支聯會面對中共打壓招數會水來土掩。

-----------------------------
打國際線 《蘋果》英文版免費試睇 按此了解更多
英文版已登錄新版《蘋果》App按此下載/更新
-----------------------------
【六四31】 專頁
毋忘初心 悼念英魂
結束一黨專政
-----------------------------
《囚牢之疆》 專頁
揭開集中營邪惡面紗
獲2020年人權新聞獎「多媒體（中文）」大獎
-----------------------------
App內1-Click訂閱《蘋果動新聞》
按此了解更多