王浩信同陳自瑤（YoYo）近期屢傳婚姻亮起紅燈，先後因為男方專注事業，忽略咗家庭，其後因同蔡思貝、江嘉敏等傳緋聞，令YoYo感到不滿，日前更有周刊報道指YoYo終於心死，佢唔止趕咗王浩信離開，兼且決定離婚，YoYo決定待女兒靖喬升小學後，就交由王浩信爸媽照顧。

盛傳主動提出離婚嘅YoYo，今日喺馬鞍山出席活動，明顯消瘦嘅YoYo。下周日就係父親節，YoYo喺台上都有分享吓父親節嘅嘢，佢話父親節同母親節一樣，小朋友會送禮物，問到YoYo收過乜禮物？佢話：「我覺得心思最緊要，小朋友唔會賺錢，所以鍾意一啲手作仔禮物，而囡囡就鍾意畫畫，每次收到禮物都會喺背後記得日期，等佢大個睇番都會好sweet。」

活動後接受記者訪問，講到點解冇戴婚戒出席活動？YoYo話其實平時都唔戴：「因為要拍劇，費事除出除入怕唔見，會好好收藏所以好少戴，唔係o依家嘅事。」有傳被老公冷落？YoYo話：「呢啲問題真係唔想再回應，事業好，當然戥佢開心，我自己有自己忙，可能係我都冷落佢，呢啲問題我今日一次過回應，以後唔再講，呢幾日嘅報道全部都唔係事實，希望唔好再亂寫，唔想影響家人，唔想影響小朋友。」

YoYo身材明顯消咗個圈，記者問佢受婚變傳聞影響咗，點知YoYo反問：「你覺得我靚咗？」記者如實話俾佢知，覺得佢瘦咗好多，YoYo就愕然：「你覺得我消瘦咗好多？冇呀，真係冇呀，不嬲都係咁。其實我只可以話呢，我嘅衣着技巧比較好啫，所以大家覺得，可能大家覺得，我塊面瘦咗。」記者再話，係成個人都瘦咗，YoYo再答：「其實呢，我嘅肚腩係有嘅，係啦，大家睇唔到啫，大家只有讚我衣着技巧好，其實我冇瘦到，我反而比以前肥咗。」

精選娛聞，喺晒《娛果》
http://fb.com/appledailyent