林曉峰（Lo）最近一口氣替ViuTV拍攝幾個綜藝節目，分別有《Good Night Show 發洩擂台》及旅遊節目《堅離地》，早前阿Lo就喺將軍澳接受《蘋果》訪問，講講呢幾個節目嘅拍攝點滴。

其中《發洩擂台》係邀請觀眾上嚟玩遊戲釋放壓力，遊戲發洩期間仲可以隨意爆粗，阿Lo覺得今次遊戲節目類型好新鮮，因為打正旗號畀平日壓力爆煲嘅香港人上嚟發洩，而且仲有獎金：「我自己都想玩埋一份，有時發洩只係好簡單，畀佢哋掟吓嘢就得，但係香港因為土地問題唔係個個做到，依家就有呢個機會。」

阿Lo更加覺得o依家做節目需要與時並進，要有空間發揮，唔係再限喺一個框框：「所以節目會有網上版同電視版，電視版係適合一家大細觀看，而網上版就係未經刪剪，原汁原味，呢樣先至叫做全方位滿足觀眾需要。」

同時佢又表示今次同陳俞希（Hailey）同英健朗（小占）嘅合作好好，佢話：「我好怕人哋同我講話一路睇我做過嘅節目，咁樣大家會好拘謹，對我嚟講我係Nothing，只係其中一位主持人，我好鍾意佢哋好唔理我，大家玩埋一齊，呢個合作好舒服。」同時直言喺佢哋身上學到好多嘢。

另外一個旅遊節目《堅離地》，就係首次同外甥女李澄（西瓜）一齊合作，兩個去到杜拜拍攝當地人嘅生活，比較佢哋嘅生活指數同香港有咩分別，雖然當地消費指數好高，但阿Lo話只要代入當地人嘅思想，你就會覺得一切都好合理。

講到同西瓜嘅合作，佢話：「我其實係第一次同西瓜一齊去旅行，諗番起佢以前細個仲係手抱嘅時候，我抱佢返電台報交通，依家就到佢自己喺電台度返工。」阿Lo話經過一齊做嘢，先至發現西瓜真係大個女：「其實我哋兩個都好獨立，各自有自己意見，十日行程我哋希望五日嗱嗱聲拍晒，留番五日畀自己玩，所以幕後人員見到我哋兩個都皺眉頭，不過係好事，起碼我哋兩個都互相了解咗好多。」

離開無綫轉到ViuTV擔任主持，阿Lo又覺得兩邊嘅工作環境有咩唔同？佢話：「我唔係為轉而轉，純粹係希望有啲改變，因為我好怕悶，好驚被人淘汰，喺一個地方太耐好容易就冇咗鬥志同動力，當每次都有呢個念頭就係提醒自己係時候要轉一轉，所以依家我係一個新人嘅身份嚟到呢度。」

阿Lo直言好似佢呢種有中年危機嘅人，更應該時刻保持學習態度：「所以我同Hailey佢哋合作嘅時候，我都叫佢哋唔使理我，諗到乜就講乜，唔好當我係前輩，所以我拍得好過癮。」

另外一個覺得自己有中年危機嘅原因，係咪見到一對囝囝年紀越來越成長，佢話：「都係㗎，依家佢哋都唔需要特別照顧，全部都忙過我，老婆有自己嘅音樂工作做，兩個仔又有佢哋嘅生活圈子，所以我更加要努力，唔好被淘汰。」

如果日後囝囝想入行？阿Lo表示同太太有共識：「如果有人搵佢佢又做得嚟有乜所謂，就好似我當年咁，成日都話我咁樣嘅樣貌可以留喺度係好幸運，我有同佢哋講，日後如果真係入行會面對啲乜嘢，你哋頂得順咪繼續做囉，但最緊要一定要讀好書，有知識先至可以解決好多問題。」

場地提供：After 3 at Campfire

Google Play 2018 年度最受歡迎應用程式，
請即點擊 http://bit.ly/2FCthz5 投《蘋果動新聞》一票

精選娛聞，喺晒《娛果》
http://fb.com/appledailyent