有傳患乳癌的前民政事務局副局長許曉暉病逝，終年44歲。她今年4月接受《蘋果》訪問時，自爆其少女時代的志願，是擔任外科醫生，但因聽從父親意願，選讀商科，「唔開心咗幾個月」，但後來很感激父親建議，因讀商科可拓闊眼界，又指父親可能為其健康着想，才叫她別從醫，「有時要做30個鐘頭手術都好攰㗎」。

許曉暉於中大工商管理學院，以一級榮譽畢業，更獲獎學金，到劍橋攻讀碩士，但原來當外科聖手，才是其少時志願，「因為我讀理科，做實驗時劏過（解剖）兔仔、老鼠等，都幾整齊，『手術』做得幾好，覺得應該有呢方面天份，哈哈……因為屋企做生意，想我讀商科，所以我冇揀讀醫。（有冇唔開心？）都唔開心咗幾個月㗎，後來諗通咗，除咗醫人嘅醫生，仲有醫企業、醫社會嘅『醫生』，呢啲我都有興趣嘅。」