柏金遜症可怕之處，就是在不知不覺間將病者由一個血肉之軀變成一具機械身體，要靠藥物「上鏈」才能走動。興叔便試過多次在最不適當的時間藥力消散，令他即時動彈不得，尷尬不已。
「佢試過有幾次喺屋企樓下公園諗住行去張櫈度坐，點知藥力過咗，成個人突然僵硬晒，只係差一步都行唔到過去，好似俾人點咗穴咁，又試過行到半路唔郁得，大便都去唔切，真係好尷尬。」興叔的妻子孔太不停搖頭歎息，坐在椅上的興叔身軀則在不停震顫，狀甚辛苦。

不幸誤信庸醫
八一年，當時任職廚師的興叔，有一天煮菜時左手無故抖顫，竟連手中的碗亦拿不穩，跌落地摔破，令興叔產生疑慮，遂往醫院檢查。
醫生指其患上「老人病」，但只叫他定時服藥和覆診，興叔便只當它是普通病看待。
「我以為只係普通麻痹抽筋，食咗藥一陣就冇事，又可以繼續返工，完全唔知道嚴重性。直到九一年情況愈來愈差，做唔到嘢先至知驚。」興叔無奈地說。
九五年，興叔從電視報道得悉廣州可用手術治療柏金遜症，於是「膽粗粗」北上一試，詎料花了一萬餘元，換來的結果卻令他後悔莫及。
「做完手術之後重衰過未做之前，差啲唔行得咁滯，返到嚟俾香港啲醫生鬧，都係自己貪平，冇考慮清楚。」興叔歎道。