泛聯盟好生猛,一時話佢哋力撐呂明華做政制事務委員會主席,一時又傳佢哋想做政府帳目委員會主席。自從去年佢哋「倒戈」支持卿姐搶咗黃宜弘財委會主席個位之後,大家就唔敢再輕視呢個手握五票嘅聯盟。
八方有日同泛聯盟成員石禮謙傾偈,佢竟然話凡政府推出嘅政改方案佢哋都支持。嘩,明撐煲呔啫!講吓講吓,佢竟然責怪八方八卦,連佢細個嘅嘢都寫埋出嚟。
事緣上兩個禮拜八方寫過篇「鳳凰台上」,話石禮謙同孫明揚細個係街坊,一齊住喺灣仔鳳凰台,個編輯重畫咗張小謙同小孫打波子嘅插畫,幅畫好得意㗎,點不知石禮謙話,自己屋企好窮,孫明揚就有錢好多,所以石家住鳳凰台嘅窮樓,孫家就住靚樓,佢哋亦冇一齊打波子咁話喎。