大家都知運動可以強身健體，不過工作忙、私人時間都要處理公務或陪屋企人嘅，自然明白要做到世衞建議，每星期做三日運動係幾有難度。政務司長張建宗相信深明此理，佢今日出席一個活動致辭時，都自認自己超重兼肥胖，皆因少運動！

其實張建宗都曾經講過自己係「波牛」，以前睇波踢波都甚有心得。話說今日活動尾聲時，就要主持開球禮，佢未等正式開球，就忍唔住「的」番幾下波過過癮。大家估下佢「的」到幾多下？

比些少數據各位參考：當時企佢隔嚟嘅醫學界立法會議員陳沛然就「的」到三下。但佢都自爆，做咗議員一年幾，雖然每星期勉強踢到一兩場波，但就冇辦法每星期都跑步，所以肥咗10磅，或者咁，技術生疏咗。

至於司長，佢都「的」到三下—不過分開兩次。