【愛的替身？】傳康子妮拍MV撻着黃翊 老婆陳存正淡然：最重要唔好搞到頭家
蘋果日報 2020/09/11 18:14
陳存正康子妮黃翊林曉峰婚變愛到底
52歲的黃翊忽然被傳是「第三者」，介入林曉峰和康子妮婚姻。《蘋果》今日聯絡到黃翊，他表示曾邀請康子妮做演唱會和音及拍攝《愛到底》MV，但已超過一年沒有聯絡，直言看到標題已經很不舒服：「話我帶老婆出嚟闢謠，似乎對我唔係太公平，我太太每逢二四六都要去洗血，我車佢出入都係生活一部份，咁講唔係幾好。」他直言擔心緋聞影響工作，亦不敢聯絡康子妮，他說：「呢個傳聞真係好奇怪，開頭都有諗過問候一聲，但後來都係咪鬼搞嘞。」是否擔心破壞好好先生形象？他緊張地說：「千祈咪話我好好先生，好棹忌，我做番份內嘢啫，人哋咁講，我通常唔出聲。」
黃翊太太陳存正患腎病多年，她直言看透生死，對老公緋聞亦不願多理，她說：「我而家都病到死死下，唔係好想講呢啲嘢，都應該信嘅，因為佢對我都幾好。我哋都廿年，大家好好感情咩？我又唔想講大話，但每對夫妻都係咁，我哋係一家人，好愛對方嘅一家人，但感情唔好講，去到咁上下都係咁。」她透露兩年前突然休克暈倒，咬到自己舌頭弄至成床血，幸得老公及時送入醫院，才拾回一命，她說：「要插晒喉用氧氣機，老公話睇住我只能吸咗4下，其他時間冇晒意識瞓咗9日，最瘦時得番101磅，所以我乜都唔理，覺得自己健康重要啲，由得佢自己搞啦，咁大個人。」她表示知道老公每日行蹤，還帶笑說：「除非我病嘅時候，咁就唔知啦。我啱啱養咗兩隻狗，真係唔得閒理咁多，最重要唔好搞到頭家，再多啲唔開心又何必，點解要去懷疑咁多嘢？」
陳存正和黃翊的兒子已經14歲，但二人一直未有結婚，陳存正認為「一張婚紙唔代表啲咩」，坦言今次事件有囝囝在旁安慰，令自己最為安慰：「唔開心會食唔到嘢瞓唔到，我病咗昏迷阿仔好擔心，所以佢今次安慰我，叫我唔好諗咁多嘢，最緊要有仔萬事足啦。」
今日有報道指康子妮一直視黃翊為偶像，2018年9月為黃翊《愛到底》MV女主角，歌曲是黃翊送給患病太太陳存正，表達對愛妻不離不棄，歌詞感人：「誰願放手 走過患難富貴同甘苦病危；愛到底 一起走到了天梯」。當時有指康子妮是「愛的替身」，與陳存正撞樣。二人在MV中表現甜蜜，一齊拍攝婚紗照，黃翊送戒指兼跪地為康子妮穿高踭鞋。康子妮曾上載MV中坐輪椅的花絮照，留言為陳存正打氣，又打趣說：「自己推自己架輪椅好攰㗎！」黃翊回覆：「你要食多啲飯先至夠力㗎」，未幾她再秒回：「我驚我食咗啲飯去晒個肚腩！」黃翊說：「你鬼有肚腩，瘦到見骨」，兩人有好多互動。同年10月黃翊舉行演唱會，再度邀請康子妮擔任和音，子妮說：「重要事要講三次！我好開心我好開心我好開心！#最愛是你」。之後又上載與對方身貼身的合照，表現興奮。
黃翊被指介入康子妮和林曉峰之間。（資料圖片）
黃翊向來是好好先生，對患病太太陳存正十分照顧，二人育有一子。（資料圖片）
陳存正直言健康最重要，現在還要照顧新養狗狗，所以不會理會老公緋聞。（圖片由受訪者提供）
陳存正表示知道老公的每日行程，工作以外還有開Live，又會與狗狗一齊放電。（IG圖片）
康子妮曾做黃翊《愛到底》MV女主角。（IG圖片）
穿起婚紗（IG圖片）
康子妮被指是「愛的替身」（IG圖片）
康子妮和黃翊合作後不時在社交網互動。（IG圖片）
（IG圖片）
康子妮又為黃翊演唱會做和音。（IG圖片）
林曉峰和康子妮結束18年婚姻，二人育有兩子。（IG圖片）
林曉峰凌晨報平安：「一切安好。」（IG圖片）
-----------------------------
《蘋果》英文版免費試睇：了解更多
-----------------------------