韓國樂隊FT Island嘅26歲成員崔敏煥，與女團LABOUM 21歲前成員律喜奉子成婚，囝囝於5月出世，兩人亦於10月補辦婚禮。

崔敏煥近日演出KBS綜藝節目《做家務的男人們2》，老婆及囝囝都有出鏡，而節目於噚晚播出有崔敏煥一家三口嘅內容，引起粉絲關注。崔敏煥提到當時一次過公開懷孕、結婚消息，坦言為老婆擔心過：「老婆正值花樣年華，驚妨礙到佢嘅前途，所以一直覺得好抱歉、內疚。同時因為FT Island嘅活動，不時都要到海外工作，得返律喜自己一個湊B，覺得佢好辛苦，所以無論佢想做咩、有咩需要，我都會全力支持佢、幫助佢。」

節目上亦見到崔敏煥對老婆嘅細心，雖然對於湊B仍然有啲生疏，仲搞到囝囝爆喊，但見到佢都好努力學習緊。雖然囝囝現時先得7個月大，不過崔敏煥已經打算生多個小朋友，律喜就一口拒絕話要等崔敏煥服完兵役先再考慮生第二胎。

精選韓流，喺晒《娛果》
http://fb.com/appledailyent