畢安喺過去的周六(23日)法國舉行嘅婚禮好低調,只係請咗22個賓客,包括畢佬嘅父親Bill、母親Jane、弟弟Doug及妹妹Jane。不過,原來安琪蓮娜嘅影星爸爸莊威(JonVoight)係完全唔知阿囡結婚!
莊威喺婚事傳出後,即刻被傳媒訪問,不過佢當時咩都唔知,只係講咗句「幾好啊」。之後佢接受美國雜誌《USWeekly》訪問就話:「個婚禮好似唔錯,所有小朋友都有參與。一定好有趣同美麗。我好替佢哋開心。」不過佢仲未有時間恭喜阿囡:「我未有機會同佢哋講嘢,我完全唔知佢哋會舉行婚禮。同埋嗰陣舉行緊艾美獎,所以我都出席唔到。」被問到有冇唔開心,佢話:「我冇失望,我明白嘅。」莊威又透露打算飛過去歐洲搵佢哋,順便幫手湊吓孫仔女。