今日聖誕節，張繼聰同簡淑兒晏晝到尖沙嘴出席活動，兩人仲唱歌及同觀眾玩遊戲，阿聰表示聖誕節開工可以同大家感受聖誕氣氛，佢又透露早前跟太太謝安琪同囝囝張瞻去日本旅行，佢話：「本來就淨係諗住同太太二人世界，可惜畀個仔偷聽到，於是就帶埋佢去，好耐未試過咁大運動量，因為阿仔好多地方想去，所以差唔多每日行咗一萬步。」

阿聰表示嚟緊一月要接拍新電影同網劇，所以特別享受o依家嘅聖誕假期，可以同屋企人相處，仲話囡囡張靖雖然十個月大，但自己已經似外父上身咁：「影響到我平時喺街見到啲後生女都會覺得點解條裙咁短？點解得兩個女仔一班男仔？」佢笑言直頭想落車走去查佢哋身份證：「我係一個開明嘅老竇，覺得囡囡到五十歲左右夠成熟就可以拍拖，其實拍拖冇所謂，最緊要到時介紹我識就可以。」

問到有冇同老婆交換聖誕禮物？佢話：「冇喎，老婆都冇喎，講開又講呢兩年都好似冇做呢啲嘢，應該都要做番，我有時都會問老婆想唔想要禮物，佢就會指一指對仔女話：『佢哋咪最好嘅禮物囉！』聽到我幾冧。」咁會唔會想再追多個小朋友？阿聰話：「唔好啦呱，老婆呢胎都已經好辛苦好偉大。」

另外，簡淑兒日前被《蘋果》影到跟男伴行街Shopping，佢表示對方並非男友：「嗰日係我去做義工買禮物，一個人拎唔晒所以搵朋友幫手。」咁同對方有無發展機會，佢話：「o依家係了解中，不過公司希望我以事業為重，我自己都係咁諗。」

更多娛聞，喺晒《娛果》
http://fb.com/appledailyent