投資銀行大賓架慨嘆本地大學生參加面試時，英文講得唔多掂，輸晒畀啲外國名校畢業生。又係好難講嘅，人哋住在一個以英語為日常用語嘅環境，早上一起身就聽英文、講英文，浸咗三至五年，點都會講英文好過本地大學生。之不過咁，如果純粹以英語水平為聘請新人的標準，請晒哈佛、耶魯、劍橋、牛津啲美國人、英國人就得啦，面試華人學生做乜。問題係香港投資銀行以中國企業為大市場，以純粹英文人打先鋒，唔多掂噃，必須請一啲雙語。小學三年級就去英國留學，唔再學中文啲香港兒童，將來返香港求職冇咁易。

大賓架聽聞母校推行國際化，部份學系選擇性用英語授課，舉手贊成。大賓架讀歷史出身，中文根底相當唔錯，後來到英國讀研究院幾年，故此英語亦佳，佢話中文大學一貫嘅好處，就係中英雙語並重，畢業生嘅中文水平，平均而言，應該係全港最好，只要在英語上再加強，競爭力將會大增。
所以大賓架對中大學生會反對以英語上課，感到驚奇，因為以中大學生入學成績嚟計，佢哋應該唔怕英語上課啫，讀大學用書、學術論文，幾乎百分之九十五都係英文，就算教授講普通話、廣東話，讀書都難以逃避英文。大賓架讀中大之時，中大學生以中文中學學生為主（當年英中生以入港大為榮），好多人讀經濟學天書Samuelson或者社會學、會計學，幾乎讀到喊，因為每頁查字典查得非常辛苦！唔好理，佢哋讀咗四年，一樣掂。今日中大啲學系以英語教學嘅，相信主要係醫學院、社會科學院，內裏精英中學生眾多，來自英中者不少，聽教授用英語上課，點會唔掂？中大學生會究竟係唔係代表大多數學生意見㗎？