蕭潤邦（Oscar）同江若琳（Elanne）今晚喺紅磡擺喜酒，向海嵐、謝天華、C君同未婚妻黃天頤、吳浩康、杜汶澤同太太田蕊妮、莊思敏、王宗堯、周慧敏等先後到達祝福一對新人，少爺占就送人情。

杜汶澤同太太田蕊妮受訪時，講到送啲咩禮物畀一對新人，阿澤話：「我除咗錢乜都冇，所以封利是做人情。」講到夫妻相處之道，阿澤話：「江若琳做過我老婆（電影《高舉愛》），所以佢識做㗎啦，做得我老婆都好辛苦，不過最重要識得賣大包，佢老公賣包㗎嘛，呢樣嘢最重要。」田蕊妮就話見到蕭潤邦江若琳呢一對覺得好幸福，阿澤跟住又讚新郎Oscar好似鄧光榮咁靚仔，估唔到江若琳會嫁個咁靚仔嘅有錢佬，自己以為佢會嫁個醜樣嘅有錢佬，所以好驚喜。

講到新人想生個豬BB，阿澤話：「直頭得啦，佢哋瞓到3、4點都唔起身㗎，我話佢哋個流程畀你聽啦，每朝Oscar返公司開會，開完會買早餐食，然之後返屋企瞓，瞓到3、4點都唔起身，咁頻密嘅夫婦生活，你話係咪應該得吖。」

至於莊思敏今晚大Deep V，佢話今晚出門口前換咗幾次衫，原來佢一早準備咗條裙，但到化好妝先發覺條拉鏈出咗事要換。講番一對新人，莊思敏話同Oscar識得耐啲，以前係同Model公司嘅師兄，入行後識咗Elanne。莊思敏祝一對新人開心幸福，快啲生個BB。而佢舊愛吳浩康都在場，佢話：「OK架，我哋有聯絡都唔會見，就算見到面都唔會尷尬。」

王宗堯有份嚟飲喜酒，佢話送人情最實際，問有乜祝福說話同一對新人講，佢話：「唔好再放閃啦，閃得太勁啦。希望佢哋快啲生個豬BB。」講到台灣樂隊閃靈唔獲批嚟香港做騷，王宗堯話：「我覺得o依家政府經常用莫須有嚟回覆所有人，例如唔批簽證，所有嘢都唔直接回覆大家，將所有嘢都政治化，我覺得好失望，o依家所有嘢都同政治分唔開㗎啦，好可惜。我有朋友聽日都會去睇，但因為我屋企人聽日先至齊人做冬食飯，所以去唔到。」

精選娛聞，喺晒《娛果》
http://fb.com/appledailyent