近日有幾套大片嘅預告都出咗街,好似有《蜘蛛俠2:決戰電魔》同埋《美國隊長2:冬日戰士》,就咁睇預告,網民都話有啲期待。
《蜘蛛俠2:決戰電魔》就會喺5月上映,而《美國隊長2:冬日戰士》就會喺3月尾上映。
先講《蜘蛛俠2:決戰電魔》,喺預告可以見到蜘蛛俠要面對3個敵人,首先係電魔,電魔原本係一個工程師,後來因為意外,成為咗一個電流形態嘅生物Electro「電魔」。喺預告度可以見到電魔都有頗多戲份,應是今集嘅主要敵人;而另一個敵人就係TheRhino「犀牛」,但就未知會唔會真係叫做「犀牛」,因為Electro都可以叫做「電魔」,可能入到戲院,TheRhino會畀人改名做「犀魔」。不過最令人期待嘅就係GreenGoblin「綠魔」,呢個名喺上一個系列嘅《蜘蛛俠》都用過,應該唔會再改喇。喺預告仲有半秒至一秒,可以見到DocOck「八爪魚博士」同Vulture「禿鷹」嘅戰衣,預告唔見佢嘅身影,好有可能係留喺下一集到出現,當然前提係要有下一集啦。
另一套就係《美國隊長2:冬日戰士》,今集就會見到敵人係Wintersoldier,即係叫「冬日戰士」(又名「酷寒戰士」)。其實同「電魔」一樣,點解個「中文名」要改到咁?算喇唔好講名嘅問題,講番條預告,今集嘅大敵人就係酷寒戰士,但當中就見到美國隊長多咗個幫手,Thefalcon,即係片入面有翼嗰個人,但未知最後會變咗咩名,唔好有期望喇。當中黑寡婦嘅戲份都好重,但就有fans就話佢肥咗,身材走樣。