當年今日
關於我們

智取大市:大價股發威江銅勝在穩 - 晉佳

蘋果日報 2012/02/29 00:00


港股午後無啦啦爆升350點,升市最好係冇理由,等理由浮面時至有機會再調整,所以短線似乎會繼續上。噚日最強板塊肯定係紙業股,玖紙(2689)業績後股價大升,帶動整個板塊上揚,暫時未知會唔會改炒業績股,要睇多一兩日。
港股調整後急升,細價股玩法又可能會轉,亦有可能由大價股主導一段時間,都係先留意番大價股。油價升到飛天,帶動其他資源價格穩步上揚,貴金屬嘅金、銅價格都表現唔錯,有利江西銅業(358)股價。如果睇好大市短線向上,買資源價格相關嘅周期性股份都冇乜錯。
雖然舊年第4季環球資源跌價,江銅第4季業績肯定唔好,但券商預測2011年市盈率8.2倍,即使第4季業績有落差,估值點計都唔貴,始終江銅防守性較好,唔似中鋁(2600)、鞍鋼(347)可以無端蝕大錢,股價大跌風險較低。如果大市續升,江銅有望出現旗形突破,中線可睇26元。
不過炒還炒,貴金屬股唔係隻隻都值博,好似齊合天地(976)咁,本身從事廢金屬回收及加工,之前發盈警話舊年第4季度虧損,原因係要為存貨撥備同重估金融工具,全年純利將會顯著減少。
睇番佢6月底止業績,最出奇係存貨大增達33.69億元,相當於市值73%,或固定資產10倍。舊年銅價下跌兩成,淨係撇賬都可以令業績非常嚇人,分分鐘純利跌幅遠超50%。存貨水平左右盤數,業務風險咁高,市賬率1倍至合適,但齊合市賬率達2.7倍,實在唔值。
財務亦唔見得健康,佢6月底冇抵押現金2.49億元,但短期銀行借貸25.22億元,半年經營現金流量4.6億元,全年約9.2億元,加上1月18日發咗3年期換股債集資8.16億元,都未夠冚短債。佢發換股債嘅同時,順便引入全球最大上市金屬回收商SMM,照計利好股價,但升咗一日約一成,之後就冇跟進,走勢麻麻。
咁多股炒,冇理由揀呢類風險同估值唔成正比嘅股。金屬股暫時睇番江銅,扒冷寧願望吓從事金屬加工同分銷、估值平嘅利記(637),等有動靜就跟進。

晉佳
本欄逢周一、三及五刊出