劉原亦的工夫茶舍除了工夫茶，最受客人歡迎的就是普洱。普洱茶越舊越好，他珍藏了不少陳年普洱茶餅，早年每塊只是數百元的茶餅，近年受惠於內地客湧港瘋搶靚茶，如今這些茶葉的身價水漲船高，部份升價數千倍，甚至升至超過百萬元一塊的天價。

「後悔以前飲咗咁多靚茶」

在劉原亦手中的芸芸天價普洱茶餅中，一塊1920年出產的「宋聘」普洱，在上世紀九十年代初每塊只賣約280元，但該塊茶餅如今約值185萬元，令人譁然。另一塊50年代的「紅印」，九十年代初每塊約值550元，當時賣得比宋聘還要貴，如今售價也急升，約值70多萬元，他形容紅印升值潛力不及宋聘，但「都夠畀首期（買樓）」。

由於價值今非昔比，劉原亦指會保留這些名貴茶葉不會飲用，又不禁打趣說：「都後悔以前飲咗咁多（靚茶）。」至於如何選擇好茶，他教路：「未必睇起上嚟越粗身嘅茶葉越好，幼身茶葉有啲都好好飲，有味道、有回甘、有質感，聞到香味係豐富嘅，就係好茶。」他又以飲水及飲牛奶作比喻，「飲水就係冇質感，飲牛奶就有」。