韓國綜藝節目搞得有聲有色，所以不時被其他國家嘅電視台借來「參考」，或者索性換湯唔換藥，基本上照Copy節目。

之前已經有唔少大陸綜藝節目被爆冇買版權就照抄韓國綜藝節目，好似喺韓國人氣節目《尹食堂》、《一日三餐》都成為大陸節目參考之一。近日大陸電視台連韓國選秀節目都唔放過，人氣選秀節目《PRODUCE101》更慘成為被抄襲目標。

當中由愛奇藝製作嘅選秀節目《明星的誕生》雖然已於去年底播出，但近日網民就留意到《明星的誕生》原來同《PRODUCE101》勁似，《PRODUCE101》首主題歌《Pick Me》唱到街知巷聞，點知《明星的誕生》竟然又炮製咗隻《Push Me》，想話冇抄真係講到冇人信。

唔少網民都覺得《明星的誕生》喺舞台佈置、賽制、小遊戲等環節都同《PRODUCE101》有九成似，唔少《PRODUCE101》嘅粉絲都炮轟《明星的誕生》抄襲，甚至傳到回韓國，不過韓國網民就發現《PRODUCE101》同《明星的誕生》嘅最大差別就係「顏值」，當中大陸版嘅參賽者完全不及韓國版，而呢點仲要係韓國同大陸網民都相當一致，網民都紛紛留言：「個樣抄唔到」、「帥哥都係我哋比較多」。