「堅離地」嘅師兄劉浩龍，噚日爆出驚人之語，謂：「我頭先去食碗麵，對面坐咗位人兄隻手係咁嘅（當然要誇張小小啦）。我每食一啖我對眼嘅視線都要望到呢對咁污糟嘅手，我嘗試食多三啖，但係我真係堅持唔到啦，我宣佈投降『走』。」然後貼上自己首新歌《走》嘅link，擺明谷歌。

似乎師兄本來都覺得呢個po冇問題，事關睇番佢fbstatus編輯history中，冇修改過字眼，反而整多咗幾個emoji。

事後師兄兩度澄清，一次係話自己「真正嘅意思並非如此，其實我自己有一個潔癖嘅少少病癥，所以我見到一啲污糟嘢，我會有少少敏感。」重申無意貶低勞動朋友嘅工作，並指噚日坐佢對面嘅人士並非從事勞動工作。師兄又話張相係網圖，唔係佢影。咁，網民就質疑，既然你有潔癖，點解仲會特登去搵呢張網圖，仲別出心裁加埋emoji，但就解釋謂「希望大家有啲乜嘢誤會，我同大家講唔好意思。」

凌晨時份，師兄刪咗污糟手嗰張相，並貼文上網再次道歉，表示「我一番表達得不清楚的言論令大家有另一個詮釋的空間，請容許我在這裡向大家致歉。」、「我是非常尊重所有基層的工作人員」。

網民反應兩極。有人撐師兄，並留言:「點解覺得別人對手污糟影響咗食慾會令大家想到咁多嘢嘅？真係好奇怪...!!？其實關唔尊重基層咩事呢？」亦有網民指師兄既已道歉，諸位不必窮追，但甫留言即引來強烈反響，有人就話:「師兄我唔知點解連我同你講打氣嘅說話都要給批評。」、「見到你發表少少感想都俾人鬧到咁，開始認真擔心香港嘅未來。」

就連JollyShandy，都來抽師兄嘅水，version是咁:「我頭先去食碗麵，對面坐咗位人兄隻手係咁嘅（當然要誇張小小啦）。我無對呢雙污糟嘅手投降，我只係買咗罐凍飲，幫佢開埋，希望佢可以紓解工作壓力。HappyFriday，生活不易啊！」如果真係要認真擔心香港嘅未來，不如想想我們這個城市是否缺乏了同理心和愛。