候任特首林鄭月娥啱啱宣佈咗新一屆嘅行會成員，同問責團隊一樣，舊面孔都唔少，但都有政黨代表換咗新人，例如工聯會元老級人馬鄭耀棠就喺董、曾、梁三任特首後退下行會火線，由該會立法會議員黃國健接任。曾經為林鄭助選嘅民建聯副主席張國鈞亦加盟，以42歲之齡成為今屆行會最年輕成員。佢哋呢兩位行會新丁，今日喺立法會排排坐密密傾。

鄭耀棠退下火線，對唔少政界嚟講都幾意外，皆因棠哥對政事仲「相當熱心」，對會務「依舊著緊」，今次願意交棒，唔知係咪有大禮在後頭？至於張國鈞，受惠於身為經民聯副主席嘅劉業強代表張學明以鄉議局身份加入行會而「升呢」，以便民建聯同經民聯都一黨兩席，皆大歡喜。

至於民建聯元老葉國謙留任，據聞佢同林鄭私交甚篤，唔知大家仲記唔記得，特首選戰初期，葉國謙曾到訪曾俊華官邸，仲被踢爆圖勸退對方呢？而非根正曲紅嘅林鄭，亦須資深左派指點迷津引下路，葉國謙留任行會，梗有其作用嘅。