提起國寶，各位諗起乜嘢呢？香港有國寶級大熊貓，仲有國寶級文物，其中一個藏寶勝地就係中大中國文化研究所文物館，位處本部百萬大道。文物館今起舉辦「北山汲古──碑帖銘刻拓本」展覽，分兩期展出合共70件珍貴文物。
「碑帖」即係碑同帖合稱，豎立嘅叫碑，橫向書寫就係帖，古代書法家墨寶，有啲仲會刻落石板或木板上，方便拓印，有啲收藏家好喜歡收集拓本。好多時原碑帖已失傳，只有拓本傳世。

本港首有機構藏品入選

中大展出嘅精品，全由利希慎四仔利榮森創立嘅北山堂捐出，其中8種碑帖仲列入第五批《國家珍貴古籍名錄》（下稱《名錄》）推薦名單！文物館副研究員何碧琪話，中大係全港首個有藏品入選《名錄》嘅機構。展覽入面，唔少拓本都同東晉大書法家王羲之有關。其中一種曾被南宋名家游相收藏過嘅《游相蘭亭》拓本，亦列入《名錄》。拓本除書法仲有圖畫。展覽中有個卷軸展品《蘭亭圖（益定王重刻本）》係按王羲之《蘭亭集序》一文所畫，記載佢同班friend飲酒作詩嘅事迹，八方覺得圖中「曲水流觴」嘅情景，有啲似現代人食迴轉壽司。

李八方
mailto:[email protected]