【六四31】鄭敬基 阮民安堅持現身維園 同嘆自由訴求被剝奪
阮民安鄭敬基
今日是六四31周年,每年在維園舉行的六四燭光晚會,今年首次被警方以限聚令為由發出反對通知書,禁止市民前往集會,變相巿民連和平哀悼的權利也失去,連維園足球場也預早封場。不過此舉仍不滅巿民一顆紀念的心,支聯會已表明即使警方反對,依然會前往維園點起燭光,不少市民傍晚時分亦響應號召,手持白蠟燭陸續前往維園。
鄭敬基(Joe)和太太Angie接近七時到達維園,Joe預早在手機內準備了電子蠟燭,懷着傷感心情與大家集體回憶,最重要是響應八時的一分鐘默哀致意。Joe接受訪問時,表示昨晚踏入六四看到很多學生片段回憶湧現,有感而發在網上發表並為香港祈禱,他說:「所以今日要出嚟,呢啲係香港人基本訴求,件事發生咗三十一年,為當年北京學生和平爭取做見證,冇理由香港關於民主訴求唔行出嚟表達。今日國歌法通過,國安法暫時未正式通過,唔知第日仲可唔可以出嚟。」
Joe今日簡單地以黑色行裝,戴上口罩,問到會否擔心現場狀況?他說:「要為難香港市民都有辦法,但我唔識其他人,根據限聚令,我又冇約埋其他人一齊,若果咁都構成犯罪就好sad好悲哀。」他表示過去一年香港人好多事情要擔心,今日亦係和平表達:「若果都唔得,點可以信國安法通過後,仲可以和平表達呢。」
連日來杜汶澤公開轟不少藝人在六四事件後,紛紛轉軚,鄭敬基亦有同感:「希望多啲我哋呢一行嘅人行出嚟,睇返以前民主歌聲獻中華片段,個個唔識啲學生,都行出嚟做啲嘢,藝人紛紛出嚟支持,但而家香港嘅學生同市民去爭取緊同一樣嘢,反而冇出過嚟,咁當時譴責政府同而家好性格分裂。」
Joe有感今年六四好可能是最後一年可以上街表達意見,所以倍添傷感:「就好似過往幫人記住件事,而家冇得記,被迫要走地下路線,乜唔係話個政府好開明咩?」
今日同樣有到維園悼念六四的阮民安(Tommy),傍晚時分現身,一身黑色衫打扮的他受訪時對集會被禁,直言:「預咗,舊年三十週年集會就已經係最後一年,呢個係一貫中共嘅做法,從來都冇承認過呢件事。」故此即使今年被禁集會,Tommy表示依然會前來維園:「我覺得係各有各做,流水式又好,港九各區開花都好,但始終都係會以維園為起點。」
Tommy又覺得警方很有可能在稍後時間就作出驅散,他說:「佢哋話如果現場情況混亂就會驅散,至於點為之混亂?完全由得佢哋講,所以希望大家小心安全為上。」
面對剛剛通過三讀的國歌法,和即將訂立的國安法,Tommy表示無擔心過會因為過往的言論被定罪:「冇諗過,如果係怕嘅由Day one開始我就唔會出聲,況且佢都冇講有冇追溯期,或者一世都有效呢,所以根本冇得驚亦都唔會驚。」
採訪:卓寶花、曹家誠
攝影:陳慧安、陳俊強
-----------------------------
身穿一身黑色衣服的他,坦言不擔心過往言論會被定罪。
除了預早在手機內準備了電子蠟燭,鄭敬基亦有點上白色蠟燭。