【新增動新聞】
熱刺咁放心賣基爾獲加畀曼城，皆因仲有另一個「基爾獲加」等上位？英國傳媒廣泛報道，指曼城將會以5,000萬鎊（約5億港元）收購熱刺右閘基爾獲加，令呢位英格蘭國腳追平大衛雷斯喺2014年由車路士加盟巴黎聖日耳門嘅全球後衛身價紀錄。雖然價錢吸引，但熱刺都要有人補上空缺先得，上季由般尼加盟嘅新晉英格蘭國腳捷比亞固然首選，其實青年軍仲有位名叫基爾獲加彼得斯（Kyle Walker-Peters）嘅右閘隨時上位！

介紹番，20歲嘅獲加彼得斯喺2015年獲提升上熱刺一隊，同年曾經隨隊去馬來西亞同澳洲踢熱身賽，今年2月先同熱刺續約至2019年。呢位同「真‧基爾獲加」一樣司職右閘嘅小將，上月更代表U-20「幼獅」贏得世青盃冠軍，其間上陣5場表現獲得好評。難怪佢喺周三代表二線隊喺閉門友賽奧連特大勝4:0一戰左腳燙射開紀錄，即刻引來唔少刺迷期待佢早日上位！