御泰中彩（555）已經有半年的靚仔業績，再加上世界盃效應，今年業績應該坐定粒六。
流動通訊普及，祖國彩票市場增長仲爆炸，可能包括御泰呢類主流營運商，日後會係對上幾年，濠賭股小型翻版。
御泰祖國彩票業，上下瓣數齊晒。而集團旗下澳客網，兼俾祖國媒體大孖沙人民網贒中，合網合營。澳客網已經連兩年，位列祖國互聯網彩票市場份額第二名，御泰架勢堂。
御泰啱啱派最新半年成績單，純利增長12%到5.5億銀。半年打後，緊接住世界盃，而單係7月，祖國彩票銷售同比翻咗半番到372億銀人仔。

御泰首站睇升57%

又專業評估，祖國去到後年，彩票市場規模，會去到5,000億銀人仔，比起上年翻半番有多。又泛互聯網（包括手機）流行，互聯網彩票市場，去到明年，有望上叩千億銀。
御泰有食力，加埋彩票市場又見高增長，嚟緊日子，掂過碌蔗。
唔好估多，御泰今年下半年EPS，keep喺上半年6.14仙，全年0.123元，增長20%，預測PE得7.2倍。上邊人民網預測PE去到63倍，祖國行家新華都37倍、鴻博54倍，御泰平咗一大截。
今年4月，御泰發行咗一批本金額16億銀可換股債券（CB），每股換股價為1.4元，御泰現價（0.88元）潛水36%之餘，相信喺彩票市場望見發光的情況下，承配人就算到價兌換咗，都唔係志在一個幾毫利潤。
長線少少，包括御泰在內的彩票股，會同呢幾年的濠賭股一樣，狂飊幾十倍。
買御泰，第一站，就係先睇CB兌換價1.4元，講緊要升57%，到時，PE先得10倍，有排未追到行家。

錢雋
細價股專家
本欄逢周二、三、五刊出