【地獄大翻身】試過拎味精煲湯鹹到喊 李亞男苦練廚藝留住老公個胃
暖男廚房新城李亞男
李亞男今日去到新城電台接受胡美儀訪問,宣傳佢最新推出嘅食譜《暖男廚房》。
李亞男自從被封地獄廚神,婚後努力鍛煉廚藝,變身為懂得煮出美味菜色嘅王太,李亞男話:「以前真係唔識煮嘢,經過多次失敗,有好大嘅挫敗感,婚前曾經用味精煲湯畀祖藍飲,王祖藍問點解咁鹹,飲到口渴,佢知道係味精之後,就即刻放低唔飲,自己都喊咗出嚟,心諗放咗咁多心機落去都係唔得。」
亞男o依家識煮多好多餸,有招牌菜,例如牛扒、花螺、花膠等,佢話:「啲朋友嚟我家食飯都預先order要食,o依家開咗個facebook專頁,同人交流煮食心得,自己以前係電腦白痴,o依家婚後可以話係重新開始,又識電腦又識煮嘢食。」
亞男指現在甚有成功感,佢話雖然未能做到肥媽、鼎爺等廚藝,但佢會搵好多有關嘅資訊去學習,李亞男話:「o依家有時間都盡量喺屋企煮飯,老公王祖藍收咗工都第一時間趕返嚟。」
打算造人嘅李亞男表示,o依家有烹調可以調理身體嘅食物,為迎接新生命做準備,亞男話:「會學煮一啲大人細路都啱食嘅食譜,留待做媽媽時有用。」
精選娛聞,喺晒《娛果》
http://fb.com/appledailyent