周柏豪一連3場演唱會，噚晚頭場喺紅館開騷，佢同女dancers跳完舞，就換咗另一套衫唱《宏願》，款似 issey miyake嗰個格格剪裁既背心，心口有P字，兩邊開窿見手臂同啲心口肉，同時又唱又吹口琴。柏豪又講到音樂團隊由細場陪到大場，咁多年嚟變咗好多，當中有人結咗婚，呢個時候歌迷就歡呼，似乎係想為上年低調結婚嘅柏豪送上祝２。

至於頭場嘉賓，犀利喇，柏豪請到張智霖（Chilam）合唱《祝君好》，唱完後二人擁抱，成功帶起全場氣氛，成為噚晚全場最好反應嘅一個環節。

Chilam話唔介意柏豪叫自己初哥哥，但介意點解要喺童年呢part邀請佢上台，Chilam話：「呢part聽見你講學校，又講老師、同學，我唔會喺你小時候嗎？」柏豪解釋：「唔係，因劇中聾啞人士角色我細個睇，覺得呢個角色好正。」暗示咗兩人年齡差距，觀眾聽到開始笑，柏豪再解釋：「細個係兩星期前，我仍然好後生。」佢仲話視Chilam為偶像，帶出正能量，係好爸爸，Chilam就話做一晚柏豪fans club阿頭。

至於噚晚仲有另一位嘉賓黃翠如，佢喺柏豪唱《百年不合》時現身，着住婚紗裙喺柏豪身邊郁幾下，又摸柏豪塊面，令觀眾都起哄，但柏豪唱完，翠如就由升降台降落台離開。

去到演唱會尾聲，柏豪再一輪熱舞，不過唱到《報告總司令》時，佢由高台旁嘅柱滑下台面，臨滑下前講咗句：「真係好高㗎！」原先應型如消防員出更，但佢滑下時不幸卡一卡，落到台面好急又狼狽喺褸袋拎番支咪唱歌，但唔好彩又卡多一次。之後柏豪邊唱邊到走觀眾席出，又遞咪俾男歌迷唱歌，男歌迷唱完幾句，柏豪仲錫咗男歌迷塊面一下，仲約定歌迷10年後再見，頭場演唱會喺11:45分完騷。