【見到都標汗】熱辣辣着大褸拍外景 劉嘉玲:拍戲就係咁
劉嘉玲任達華許願樹林村我的情敵女婿
劉嘉玲、任達華、唐詩詠、姜皓文同麥玲玲等今日到林村許願樹廣場,為電影《我的情敵女婿》拍攝外景。喺炎熱天氣下,一眾演員都熱到成身大汗,華哥指由晨早六點開工至中午,已經換咗成十件衫,仲笑指女神嘉玲姐令現埸更熱情升溫,身旁着住大褸嘅嘉玲姐指拍戲就係咁,冇得投訴。
戲中演劏房大王嘅華哥被嘉玲姐感化,將旗下劏房豪裝再以兩蚊租畀年輕人。現實生活中,物業遍布世界嘅華哥自言係良心業主,租客都長期租住,嘉玲姐指人大咗,覺得太多物業會令管理繁複,所以將資產轉為較進取嘅投資生意。
嘉玲姐首任監製及演出電影《以青春的名義》,獲選為今屆香港亞洲電影節開幕電影,嘉玲姐覺得今次對香港電影有鼓勵性,佢又指香港有電影方面人才,但尋找投資者就非常困難,因為近年以投資合拍片為主,佢相信只要有人肯投資港產片,一定有創新題材電影。
今日陽光普照,喺大大個太陽下,着住件大褸嘅嘉玲,就話拍戲冇得投訴。