地產股前日已異動,昨日炒上,滙控、中移動加埋地產股向好,恒指嘅升勢已經唔係好似之前咁「假」,一直睇淡嘅投資者係咪要改變睇法,自己諗諗。
個市唞一日,但唔係代表個市冇嘢炒,啲國內銀行股就把握機會炒上,成為市場嘅焦點,上市個半月嘅招行(3968)突破咗12.60元,企喺12.62元收市,啲技術指標好醒目,技術形態就話要升,下個禮拜會上試13元,破位就睇14元。
招行C輪9075:招行C輪9075收1.23元,有5個月壽命,溢價4.8%,唔貴,槓桿率10.3倍(有效7倍),輕微價內,對沖值0.68,好好炒,正股升上13元,9075應該靠近1.50元,正股上試14元,隻輪會喺2.20元樓上,呢個價買,正股跌穿12.30元止蝕。
俊樺