由宋慧喬、宋仲基主演嘅熱播劇《太陽的後裔》紅遍亞洲，幾乎人人都識，而收視更屢創新高。但原來《太陽》當初因題材內容太硬，難以置入廣告，差啲冇電視台肯買播映權，連曾經播出《來自星星的你》、《龍八夷》等大熱劇嘅SBS電視台都驚蝕本而唔敢買，最終就由對手KBS執二攤。

而《太陽》有別於一般韓劇邊拍邊播，係採用「先拍後播」嘅模式。之前都試過有韓劇係「先拍後播」，例如男團東方神起成員Max同李延喜合作嘅《天堂牧場》、蘇志燮同金荷娜合作嘅《ROADNO.1》，但收視都只有個位數，令《太陽》劇組相當擔心觀眾嘅接受度。而因為《太陽》題材太硬，廣告商好難置入廣告行銷，所以好多電視台都驚買咗之後搵唔到廣告商，需自行吸收巨額成本，怕食蝕而唔敢買，結果就益咗KBS，令KBS憑《太陽》挽救該台低迷嘅收視率。