「拍拖一年，先發現佢用我名借錢，欠下20、30萬，到𠵱家仲還緊錢！」曾與阿T拍拖2年的阿Yan爆料，二人拍拖一年，阿T便露出本性，「成日扮有錢，次次出街食飯就藉口唔畀錢，成日向朋友偷呃拐騙。」最終T更向她落手。

愛跳街舞的Yan約8年前認識同樣跳街舞的次被告阿豪，「有次阿豪話有朋友開party，叫我哋成班去玩，上到去佢就介紹搞手阿T畀我認識。」其後她與阿T開始拍拖，雖然男友自稱開公司做老闆，又看似是個有錢人，但每次出街食飯，總借意不埋單，「有時話冇帶現金，有時話公司周轉不靈，次次都係我畀錢。」

其後，Yan更發現阿T騙取朋友的錢，「氹佢哋申請信用卡，之後買嘢套現，錢就佢落袋，話佢有朋友喺信用卡公司做，可以豁免唔使還卡數。」結果不少朋友中招孭起卡數。之後就連Yan也成為他的囊中物，她發現T利用其名字借錢，欠債20、30萬元，「我有質問佢，佢就話唔使我還。」但事實並非如此，事後她被上門追數，對月入1萬多元的她來說，每月要還款感吃力，至今6年仍未還完。

她更發現男友是個「大話王」，阿T曾自稱腰間打有一個瑞士銀行的透明「barcode」，要用特別系統照射認證才可以提款，當時剛中學畢業的Yan聽罷信以為真，就連阿T的朋友亦「信到十足」：「佢同身邊朋友講，成日帶我去旅行、食好嘢，搞到我提出分手係我唔啱，但事實佢滿口大話。」

最後Yan提出分手，阿T卻死纏爛打，她只好偷偷離家出走並拒絕接聽其電話，拖拉半年才正式斬纜。其後阿T搬往荃灣DAN 6工廈，Yan相約取回他們之前同居時的物件，但T稱將物品一併搬去DAN6，「我上門攞返，佢竟然同我講，佢買咗呢個單位，諗住等我返嚟一齊住，但佢害到我咁，我絕對唔會再相信佢！」

----------------------------
【匿名港警爆大鑊】
韓國KBS時事節目《時事直擊：香港 被自殺》
一按即睇
-----------------------------
【撐學生】
召集有心人 撐學生全年睇《蘋果》
立即按此
---------------------------
你敢爆，我敢獎！ 立即WhatsApp《蘋果》24小時爆相爆片熱線 或致電：63836568