唔少圈中男藝人愛收藏名車，包括周杰倫(周董)、黎明、沈嘉偉及林海峰等均係愛車之人，不過當中最瘋狂嘅，相信係郭富城(城城)，城城車房內名車眾多，兼且部部價值不菲!

城城噚晚11點幾喺facebook晒法拉利，留言：「端午節快樂！今天特別開心，從法拉利大中華地區的CEOMatteo手上，接過我的夢想號FerrariFXXK，風馳的駿馬，與風同行。」城城透過經理人小美回應：「這是我的夢想號，應該不會運回香港駕駛，只用作賽車用途。」

據知城城去咗意大利收車，架車係身價驚人嘅「終極馬王」法拉利FXXK落場版，全球僅限量32架，鷗翼車門設計，排氣量6262c.c嘅V12引擎，能提供860匹嘅最大馬力，搭載HY-KERS系統嘅電動摩打，能額外輸出達190匹最大馬力，估計剩車價220萬歐羅(約2千萬港元)，要曾經擁有法拉利嘅人，先至有權買。

城城女友Moka今午亦喺微博貼自拍相，更戴上黑超，寫道：「趁還沒有曬黑，趕緊耍個帥!」見黑超嘅倒影，估計佢身處喺賽車場地，估計佢係同城城一齊去咗意大利，新城嫂po出「自拍」，又可以力證地位冇變!